اب تو وہ شخص زمانے میں اثر رکھتا ہے

اب تو وہ شخص زمانے میں اثر رکھتا ہے

دس سے جو بیس بنانے کا ہنر رکھتا ہے

اپنے کردار سے ہوتی ہے شکایت جس کو

اپنے بچوں پہ بڑی سخت نظر رکھتا ہے

وقت کے ساتھ نہ بدلا مرے قاتل کا مزاج

آج بھی ہونٹ مرے خون سے تر رکھتا ہے

اس کو بھی لوگ اندھیروں سے ڈرانے نکلے

دسترس میں جو کئی شمس و قمر رکھتا ہے

اب کا انسان ہے ایسا کہ یقین آتا نہیں

مرتبہ اونچا فرشتوں سے بشر رکھتا ہے

اب کے بوچھار بہت ہوگی ظفرؔ تیروں سے

وہ چلے ساتھ جو پتھر کا جگر رکھتا ہے

ab to wo shakhs zamane mein asar rakhta hai

das se jo bis banane ka hunar rakhta hai

apne kirdar se hoti hai shikayat jis ko

apne bachchon pe bari sakht nazar rakhta hai

waqt ke sath na badla mire qatil ka mizaj

aj bhi hont mire khun se tar rakhta hai

us ko bhi log andheron se darane nikle

dastaras mein jo kai shams-o-qamar rakhta hai

ab ka insan hai aisa ke yaqin ata nahin

martaba uncha farishton se bashar rakhta hai

ab ke bauchhar bahut hogi zafar tiron se

wo chale sath jo patthar ka jigar rakhta hai