جس طرف جائیے ملتے ہیں عداوت والے

جس طرف جائیے ملتے ہیں عداوت والے

اٹھ گئے دنیا سے کیا لوگ محبت والے

دوستو تم ہو اگر چشم عنایت والے

ہم بھی کچھ کم نہیں خوددار طبیعت والے

اپنے ہاتھوں سے بناتے ہیں مقدر اپنا

گردش وقت سے ڈرتے نہیں ہمت والے

موج ساحل کا بھی سر توڑ کے رکھ دیتی ہے

کیا سمجھتے ہیں غریبوں کو یہ دولت والے

جتنے بونے تھے انہیں تمغہ و اعزاز ملا

اور چپ رہ گئے اونچے قد و قامت والے

ابتدا ہی میں یہ وحشت یہ بدن میں لرزش

مرحلہ اور بھی آئیں گے مصیبت والے

منزل دار پہ اک میں ہی اکیلا پہنچا

گھر سے نکلے تھے بہت شوق شہادت والے

تلخ باتوں کو بھی سہہ لیتے ہیں چپ چاپ ظفرؔ

منہ کمینوں سے لگاتے نہیں عزت والے

jis taraf jaiye milte hain adawat wale

uth gae duniya se kya log mohabbat wale

dosto tum ho agar chashm-e-inayat wale

ham bhi kuchh kam nahin khuddar tabiat wale

apne hathon se banate hain muqaddar apna

gardish-e-waqt se darte nahin himmat wale

mauj-e-sahil ka bhi sar tor ke rakh deti hai

kya samajhte hain gharibon ko ye daulat wale

jitne bone the unhen tamgha-o-ezaz mila

aur chup rah gae unche qad-o-qamat wale

ibtida hi mein ye wahshat ye badan mein larzish

marhala aur bhi aenge musibat wale

munzzal dar pe ik main hi akela pahuncha

ghar se nikle the bahut shauq-e-shahadat wale

talkh baton ko bhi sah lete hain chup chap zafar

munh kaminon se lagate nahin izzat wale