عمر بھر کے خواب کا حاصل سمجھ بیٹھے ہیں لوگ

عمر بھر کے خواب کا حاصل سمجھ بیٹھے ہیں لوگ

سایۂ دیوار کو منزل سمجھ بیٹھے ہیں لوگ

دشت و دریا سے گزر ہو یا خلاؤں کا سفر

اب بھی آساں ہے مگر مشکل سمجھ بیٹھے ہیں لوگ

کس نظر سے دیکھتے ہیں مجھ کو سب معلوم ہے

اپنی جانب سے مجھے غافل سمجھ بیٹھے ہیں لوگ

زندگی کے ایک اک پل کی خبر رکھتا ہوں میں

بے نیاز حال و مستقبل سمجھ بیٹھے ہیں لوگ

موجۂ آفات کا رخ موڑنے میں غرق ہوں

مجھ کو بھی آسودۂ ساحل سمجھ بیٹھے ہیں لوگ

سازشی پردہ پڑا ہے جھوٹ سچ کے درمیاں

کون قاتل ہے کسے قاتل سمجھ بیٹھے ہیں لوگ

کس قدر ذی فہم ہیں سب کس قدر بالغ نظر

ایک جگنو کو مہ کامل سمجھ بیٹھے ہیں لوگ

جو گزرتا ہے وہ ٹھوکر مار دیتا ہے ظفرؔ

راہ کے پتھر کو میرا دل سمجھ بیٹھے ہیں لوگ

umr bhar ke khwab ka hasil samajh baithe hain log

saya-e-diwar ko manzil samajh baithe hain log

dasht-o-dariya se guzar ho ya khalaon ka safar

ab bhi asan hai magar mushkil samajh baithe hain log

kis nazar se dekhte hain mujh ko sab maalum hai

apni janib se mujhe ghafil samajh baithe hain log

zindagi ke ek ik pal ki khabar rakhta hun main

be niyaz-e-hal-o-mustaqbil samajh baithe hain log

mauja-e-afat ka rukh morne mein gharq hun

mujh ko bhi asuda-e-sahil samajh baithe hain log

sazishi parda para hai jhut sach ke darmiyan

kaun qatil hai kise qatil samajh baithe hain log

kis qadar zi fahm hain sab kis qadar baligh nazar

ek jugnu ko mah-e-kamil samajh baithe hain log

jo guzarta hai wo thokar mar deta hai zafar

rah ke patthar ko mera dil samajh baithe hain log