آپ سے شکوۂ بیداد نہیں کرتے ہم

آپ سے شکوۂ بیداد نہیں کرتے ہم

ہونٹ سی لیتے ہیں فریاد نہیں کرتے ہم

مژدۂ ذوق اسیری کہ وہ فرماتے ہیں

قید غم سے تجھے آزاد نہیں کرتے ہم

مسکرا دیتے ہیں جب کوئی بلا آتی ہے

کسی صورت غم افتاد نہیں کرتے ہم

خوب پردہ ہے یہ ظاہر کا گماں ہے ان کو

خواہش حسن خداداد نہیں کرتے ہم

دل میں باقی ہے ابھی حوصلۂ صبر و قرار

حسرت تیشۂ فرہاد نہیں کرتے ہم

کیا خبر کون سی منزل پہ محبت پہنچی

اب یہ عالم ہے تجھے یاد نہیں کرتے ہم

اپنی افتاد و طبیعت ہی کچھ ایسی ہے نظیرؔ

کبھی اندیشۂ افتاد نہیں کرتے ہم

ap se shikwa-e-bedad nahin karte ham

hont si lete hain fariyad nahin karte ham

muzhda-e-zauq-e-asiri ke wo farmate hain

qaid-e-gham se tujhe azad nahin karte ham

muskura dete hain jab koi bala ati hai

kisi surat gham-e-uftad nahin karte ham

khub parda hai ye zahir ka guman hai un ko

khwahish-e-husn-e-khudadad nahin karte ham

dil mein baqi hai abhi hausla-e-sabr-o-qarar

hasrat-e-tesha-e-farhad nahin karte ham

kya khabar kaun si manzil pe mohabbat pahunchi

ab ye alam hai tujhe yad nahin karte ham

apni uftad-o-tabiat hi kuchh aisi hai nazir

kabhi andesha-e-uftad nahin karte ham