کہا کس نے کہ مرنا قید سے غم کی نکلنا ہے

کہا کس نے کہ مرنا قید سے غم کی نکلنا ہے

اجل تو اک حیات عشق کا پہلو بدلنا ہے

فقط صیاد ہی کا ڈر نہیں اہل نشیمن کو

ابھی برق بلا کی زد سے بھی بچ کر نکلنا ہے

لب ساحل پہنچنے کی خوشی کیسی ابھی اے دل

تلاطم خیز طوفانوں سے ٹکرا کر نکلنا ہے

ابھی ان ابتدائی مشکلوں پر رنج و غم کیسا

ہمیں تو ورطۂ بحر حوادث ہی میں پلنا ہے

بلا سے حق بیانی پر سزا ملتی ہے بھگتیں گے

ہمیں بھی سرمد و منصور ہی کی راہ چلنا ہے

بھلا تم مصلحت اس ضبط سوز غم کی کیا جانو

جو پھونکیں ظلم کے خرمن کو وہ شعلے اگلنا ہے

یہ رسم مے کدہ ہے گاہ مستی گاہ ہشیاری

سنبھل کر گر چکے اب گر کے پھر ہم کو سنبھلنا ہے

وہ ہوں گے اور جو پھولوں کی سیجوں پر ہیں خوابیدہ

ہمیں اے دورئ منزل ابھی کانٹوں پہ چلنا ہے

kaha kis ne ke marna qaid se gham ki nikalna hai

ajal to ik hayat-e-ishq ka pahlu badalna hai

faqat sayyad hi ka dar nahin ahl-e-nasheman ko

abhi barq-e-bala ki zad se bhi bach kar nikalna hai

lab-e-sahil pahunchne ki khushi kaisi abhi ai dil

talatum khez tufanon se takra kar nikalna hai

abhi un ibtidai mushkilon par ranj-o-gham kaisa

hamen to wartaha-e-bahr-e-hawadis hi mein palna hai

bala se haq bayani par saza milti hai bhagatenge

hamen bhi sarmad-o-mansur hi ki rah chalna hai

bhala tum maslahat is zabt-e-soz-e-gham ki kya jano

jo phunken zulm ke khirman ko wo shole ugalna hai

ye rasm-e-mai kada hai gah masti gah hushyari

sambhal kar gar chuke ab gir ke phir ham ko sambhalna hai

wo honge aur jo phulon ki sejon par hain khwabida

hamen ai duri-e-manzil abhi kanton pe chalna hai