خدا معلوم جب غنچے ہنسے شبنم پہ کیا گزری

خدا معلوم جب غنچے ہنسے شبنم پہ کیا گزری

تبسم کی فضا میں دیدۂ پر نم پہ کیا گزری

جلی شاخ نشیمن تک نشیمن کی رفاقت میں

پتا کیا بجلیوں کو ہم صفیرو ہم پہ کیا گزری

نہ پایا فرق اسیری اور آزادی میں جب کوئی

کہوں کیا اس گھڑی اپنے دل پر غم پہ کیا گزری

عزیز مصر کیا جانے یہ پوچھو پیر کنعاں سے

کہ فرقت میں پسر کی دیدۂ پر نم پہ کیا گزری

اسے محسوس کر سکتا بھلا کیا ذوق ابلیسی

کہ جنت سے نکلنے میں دل آدم پہ کیا گزری

نشیمن کی نہ چھوڑی خاک بھی برق حوادث نے

یہ منظر دیکھ کر ہم کیا بتائیں ہم پہ کیا گزری

نہ سلجھے تم نے سلجھانے کو ویسے لاکھ سلجھایا

مری وحشت سے دیکھو گیسوئے برہم پہ کیا گزری

جو ہو بے درد اس کو درد کا احساس کیونکر ہو

ستم گر کی بلا جانے ستم سے ہم پہ کیا گزری

غم جاناں ہی کیا کم تھا غم دوراں بھی اپنایا

خدا جانے اسیر گیسوئے پر خم پہ کیا گزری

ہماری ایک جرأت نے جو ذوق زندگی بدلا

بتائیں کیا دل ناآشنائے غم پہ کیا گزری

سبب یاران ساحل اے نظیرؔ زار کیا جانیں

کہ طوفان بلا میں ڈوبتوں کے دم پہ کیا گزری

khuda maalum jab ghunche hanse shabnam pe kya guzri

tabassum ki faza mein dida-e-pur nam pe kya guzri

jali shakh-e-nasheman tak nasheman ki rifaqat mein

pata kya bijliyon ko ham safiro ham pe kya guzri

na paya farq-e-asiri aur azadi mein jab koi

kahun kya us ghari apne dil par gham pe kya guzri

aziz-e-misr kya jane ye puchho pir-e-kanan se

ke furqat mein pisar ki dida-e-pur nam pe kya guzri

use mahsus kar sakta bhala kya zauq-e-iblisi

ke jannat se nikalne mein dil-e-adam pe kya guzri

nasheman ki na chhori khak bhi barq-e-hawadis ne

ye manzar dekh kar ham kya bataen ham pe kya guzri

na suljhe tum ne sulajhane ko waise lakh suljhaya

miri wahshat se dekho gesu-e-barham pe kya guzri

jo ho be dard us ko dard ka ehsas kyunkar ho

sitam gar ki bala jane sitam se ham pe kya guzri

gham-e-janan hi kya kam tha gham-e-dauran bhi apnaya

khuda jane asir-e-gesue par kham pe kya guzri

hamari ek jurat ne jo zauq-e-zindagi badla

bataen kya dil-e-naashna-e-gham pe kya guzri

sabab yaran-e-sahil ai nazir-e-zar kya janen

ke tufan-e-bala mein dubton ke dam pe kya guzri