فقط امید سے گلشن کی ویرانی نہیں جاتی

فقط امید سے گلشن کی ویرانی نہیں جاتی

یہ جاتے جاتے جاتی ہے بہ آسانی نہیں جاتی

جو ہم نے کہہ دیا تصدیق کا محتاج ہوتا ہے

ہماری بات اکثر مستند مانی نہیں جاتی

جنوں والوں کو اب تو واقعی ناداں سمجھتے ہیں

نہ جانے کیوں خرد والوں کی نادانی نہیں جاتی

برہنہ ہے اگر انساں مہذب ہو نہ مخلص ہو

فقط ملبوس سے انساں کی عریانی نہیں جاتی

تو پھر کیسے نہ ہو ہم کو تغیر کا یقیں یکتاؔ

جب اپنی شکل خود ہم سے ہی پہچانی نہیں جاتی