چھوڑ کے فرزانوں کی محفل تنہا اس دیوانے کو

چھوڑ کے فرزانوں کی محفل تنہا اس دیوانے کو

حضرت ناصح کیوں آ جاتے ہیں اکثر سمجھانے کو

کم ظرفوں کے در کی غلامی میرے بس کی بات نہیں

ایسے جینے پر میں کیوں ترجیح نہ دوں مر جانے کو

موت سے جن کو ڈر لگتا ہے ہوں گے وہ لوگ اور کوئی

ہر لمحہ تیار ہیں ہم طوفاں سے آنکھ ملانے کو

یہ ہے مسجد وہ ہے مندر یہ ہے کلیسا وہ گرودوار

بانٹ دیا کتنے حصے میں ہم نے عبادت خانے کو

موت کے ڈر سے سب خاموش رہیں گے یہ نا ممکن ہے

کوئی نہ کوئی تو اٹھے گا باطل سے ٹکرانے کو

نفرت اور عداوت کی تعلیم جہاں دی جاتی ہے

جی کرتا ہے آگ لگا دوں ایسے عبادت خانے کو

عزم صادق لے کر جب دریا میں کوئی اترے گا

آئیں گی پھر موجیں خود ہی کشتی پار لگانے کو

تابشؔ بس یہ سوچ کے میں نے آگ لگا دی کشتی میں

بھول کے بھی اب کوئی نہ سوچے لوٹ کے واپس جانے کو

chhor ke farzanon ki mahfil tanha is diwane ko

hazrat naseh kyun a jate hain aksar samjhane ko

kam zarfon ke dar ki ghulami mere bas ki bat nahin

aise jine par main kyun tarjih na dun mar jane ko

maut se jin ko dar lagta hai honge wo log aur koi

har lamha tayyar hain ham tufan se ankh milane ko

ye hai masjid wo hai mandir ye hai kalisa wo girodawar

bant diya kitne hisse mein ham ne ibadat khane ko

maut ke dar se sab khamosh rahenge ye na mumkin hai

koi na koi to uthega batil se takrane ko

nafrat aur adawat ki taalim jahan di jati hai

ji karta hai ag laga dun aise ibadat khane ko

azm-e-sadiq le kar jab dariya mein koi utrega

aengi phir maujen khud hi kashti par lagane ko

tabish bas ye soch ke main ne ag laga di kashti mein

bhul ke bhi ab koi na soche laut ke wapas jane ko