محبت زندگی ہے زندگی کا نام مستی ہے

محبت زندگی ہے زندگی کا نام مستی ہے

اگر مستی نہ ہو تو زندگی مٹی سے سستی ہے

اگاؤ دور تک اے دوستوں فصلیں محبت کی

محبت جس جگہ ہوتی نہیں لعنت برستی ہے

وہ راہ زندگی میں مسکرانا بھول جاتا ہے

غریبی جس کو اپنی زلف کے پنجے میں کستی ہے

کبھی وہ جوش تھا اپنے کنارے کاٹ دیتی تھی

مگر اب تو ندی خود قطرے قطرے کو ترستی ہے

لٹیرے اور قاتل ہر جگہ ہیں شہر میں انجمؔ

نہیں معلوم حاصل ان کو کس کی سر پرستی ہے

mohabbat zindagi hai zindagi ka nam masti hai

agar masti na ho to zindagi mitti se sasti hai

ugao dur tak ai doston faslen mohabbat ki

mohabbat jis jagah hoti nahin laanat barasti hai

wo rah-e-zindagi mein muskurana bhul jata hai

gharibi jis ko apni zulf ke panje mein kasti hai

kabhi wo josh tha apne kinare kat deti thi

magar ab to nadi khud qatre qatre ko tarasti hai

lutere aur qatil har jagah hain shahr mein anjum

nahin maalum hasil un ko kis ki sar parasti hai