Arooz is now on the App Store, for iPhone and iPad. Download →

All poetry

طرح طرح کے فسانے سنانے لگتی ہے

Ehtisham ul Haq Siddiqui

طرح طرح کے فسانے سنانے لگتی ہے

اڑوں تو میری زمیں چھٹپٹانے لگتی ہے

غرور نسل ہے یک لخت تو نہ جائے گا

کہ لگتے لگتے یہ دولت ٹھکانے لگتی ہے

نہ جانے کیسی ہوا ہے کہ رات ہوتے ہی

بدن میں آ کے مرے خاک اڑانے لگتی ہے

میں اپنی پیاس پہ جب صبر باندھ دیتا ہوں

تو جو ندی بھی ملے آزمانے لگتی ہے

جہاں جہاں بھی میں اس سے گریز کرتا ہوں

وہیں وہیں سے وہ آواز آنے لگتی ہے

خیال تک بھی اگر اس کا نام آ جائے

وہ ہاتھ چپکے سے میرا دبانے لگتی ہے

وہ ایک خوشبو ہے آتی نہیں نظر لیکن

قریب آتے ہی خود کو بتانے لگتی ہے