یہ دنیا ہے یہاں اصلی کہانی پشت پر رکھنا

یہ دنیا ہے یہاں اصلی کہانی پشت پر رکھنا

لبوں پر پیاس رکھنا اور پانی پشت پر رکھنا

تمناؤں کے اندھے شہر میں جب مانگنے نکلو

تو چادر صبر کی صدیوں پرانی پشت پر رکھنا

میں اک مزدور ہوں روٹی کی خاطر بوجھ اٹھاتا ہوں

مری قسمت ہے بار حکمرانی پشت پر رکھنا

تجھے بھی اس کہانی میں کہیں کھونا ہے شہزادے

خدا حافظ یہ مہر خاندانی پشت پر رکھنا

ہمیشہ وقت کا دریا اسے رفتار بخشے گا

جسے آتا ہو دریا کی روانی پشت پر رکھنا

ye duniya hai yahan asli kahani pusht par rakhna

labon par pyas rakhna aur pani pusht par rakhna

tamannaon ke andhe shahr mein jab mangne niklo

tu chadar sabr ki sadiyon purani pusht par rakhna

main ik mazdur hun roti ki khatir bojh uthata hun

miri qismat hai bar-e-hukmarani pusht par rakhna

tujhe bhi is kahani mein kahin khona hai shahzade

khuda hafiz ye mehr-e-khandani pusht par rakhna

hamesha waqt ka dariya use raftar bakhshega

jise ata ho dariya ki rawani pusht par rakhna