ہجوم یاس میں بھی آس جاوداں ٹھہری

ہجوم یاس میں بھی آس جاوداں ٹھہری

یہ اپنی دھرتی کی بوباس بے کراں ٹھہری

وہ روکتے رہے ملکوں کی سرحدوں کے پرے

کشش دلوں کی تو پروائی تھی کہاں ٹھہری

امید و بیم میں کتنے کنول ہوئے روشن

تمہاری چشم تغافل جہاں جہاں ٹھہری

نمود فکر نے کتنے بنائے ریت پہ نقش

میں کیا کروں کہ یہ تصویر بے زباں ٹھہری

ہر ایک کاسۂ سر ہے فقیر کا پیالہ

زباں سوالیٔ بیکس تو بے زباں ٹھہری

وہی حیات جو سب کے لیے تھی راحت جاں

وہی مرے لیے اک مرگ بے اماں ٹھہری

کہیں افادہ کہیں مول تول کی باتیں

یہ فکر نو تو کسی بنئے کی دکاں ٹھہری

hujum-e-yas mein bhi as jawedan thahri

ye apni dharti ki bubas be karan thahri

wo rokte rahe mulkon ki sarhadon ke pare

kashish dilon ki to purwai thi kahan thahri

ummid-o-bim mein kitne kanwal hue raushan

tumhari chashm-e-taghaful jahan jahan thahri

numud fikr ne kitne banae ret pe naqsh

main kya karun ke ye taswir be zaban thahri

har ek kasa-e-sar hai faqir ka pyala

zaban sawali-e-bekas to be zaban thahri

wahi hayat jo sab ke liye thi rahat-e-jan

wahi mire liye ik marg-e-be aman thahri

kahin ifada kahin mol tol ki baten

ye fikr-e-nau to kisi baniye ki dukan thahri