حریم ذات کے پردے میں جستجو یاراں

حریم ذات کے پردے میں جستجو یاراں

زہے نصیب مجھے میری آرزو یاراں

ہوس کو عشق بتا کر تہی کدو یاراں

مے ایاغ سے چھلکا گئے لہو یاراں

شباب ہے مرے ساقی کا آفتاب کی لو

بدن ہے ساز میں دیپک کی اک نمو یاراں

اسی گنہ نے ملائک پہ فوقیت بخشی

یہی گنہ بشریت کی آبرو یاراں

کبھی خزاں میں کبھی خار و خس کے پردے میں

چمن میں بکھرے ہیں ہر سمت رنگ و بو یاراں

جسے میں خود سے بھی کہنے کی تاب لا نہ سکا

وہ ایک بات کہی ان کے روبرو یاراں

وہی تو جام شفا ہے بلا کشوں کے لیے

وہ اک نگاہ جو پھرتی ہے چار سو یاراں

اسی خلش نے اسے خود کشی پہ اکسایا

کہ ایک شخص سے ملتا ہے ہو بہ ہو یاراں

زمانہ بدلا ہے رنگ چمن بھی بدلے گا

چنار اب نظر آتے ہیں شعلہ رو یاراں

harim-e-zat ke parde mein justuju yaran

zahe nasib mujhe meri arzu yaran

hawas ko ishq bata kar tahi kaddu yaran

mai ayagh se chhalka gae lahu yaran

shabab hai mire saqi ka aftab ki lau

badan hai saz mein dipak ki ik numu yaran

isi gunah ne mulaik pe fauqiyat bakhshi

yahi gunah bashariyyat ki abru yaran

kabhi khizan mein kabhi khar-o-khas ke parde mein

chaman mein bikhre hain har samt rang-o-bu yaran

jise main khud se bhi kahne ki tab la na saka

wo ek bat kahi un ke rubaru yaran

wahi to jam-e-shifa hai bala kashon ke liye

wo ik nigah jo phirti hai char su yaran

isi khalish ne use khud kashi pe uksaya

ke ek shakhs se milta hai hu ba hu yaran

zamana badla hai rang-e-chaman bhi badlega

chanar ab nazar ate hain shola ro yaran