Arooz is now on the App Store, for iPhone and iPad. Download →

All poetry

وعدۂ الفت و پیمان وفا سے توبہ

Jafar Raza (1939–2022)

وعدۂ الفت و پیمان وفا سے توبہ

تجربہ کہتا ہے اس حسن ادا سے توبہ

رات تاریک ہے بے چینی بڑھی جاتی ہے

جس کا الٹا ہو اثر ایسی دعا سے توبہ

اپنا گھر بن گیا مقتل مگر ہم اہل یقیں

نہیں کرتے ہیں غم‌ ہوش ربا سے توبہ

ان کی فسطائی طبیعت میں ہے قتل و غارت

کیوں کریں گے وہ بھلا ظلم و جفا سے توبہ

بجلی چمکے تو بہانے سے لپٹ جاتے ہیں

پھر وہ کہتے ہیں بڑی شرم و حیا سے توبہ

چشم ساقی کی قسم تھا یہ بہانہ ورنہ

کہیں کرتے ہیں مئے و جام کے پیاسے توبہ

اس نے تو چیر دیا اہل چمن کے دل کو

اب کے بل کھائی ہوئی باد صبا سے توبہ