نا اہل اور نکمے سوا اس کے کیا کریں

نا اہل اور نکمے سوا اس کے کیا کریں

بیٹھے ہر ایک شخص پہ بس تبصرہ کریں

اچھا ہے آپ اپنی ہمیشہ کہا کریں

لیکن کبھی کبھار مری بھی سنا کریں

حق بات منہ پہ کہنے کی عادت ہے کیا کریں

کم ظرف ہم سے سوچ سمجھ کر ملا کریں

منصف وہی گواہ وہی مدعی وہی

ان کو ہی اختیار ہے جو فیصلہ کریں

محسن ہو چارہ گر ہو مسیحا ہو کیا ہو تم

ہم تم سے اپنے درد کا کیوں تذکرہ کریں

کافی ہے اپنے واسطے بس اک خدا کی ذات

ہر در پہ جا کے کس لئے ہم التجا کریں

بزدل کی طرح کس لیے بیٹھے ہیں گھات میں

ہمت اگر ہے آپ میں تو سامنا کریں

کیا ایک ہم ہی ٹھہرے محبت کے پاسدار

کیا ایک ہم ہی سارے جہاں سے وفا کریں

شعروں میں دھیرے دھیرے ضرور آئے گا نکھار

استاد شاعروں کو اے تابشؔ پڑھا کریں

na ahl aur nikamme siwa us ke kya karen

baithe har ek shakhs pe bas tabsira karen

achchha hai ap apni hamesha kaha karen

lekin kabhi kabhar miri bhi suna karen

haq bat munh pe kahne ki adat hai kya karen

kam zarf ham se soch samajh kar mila karen

munsif wahi gawah wahi muddai wahi

un ko hi ikhtiyar hai jo faisla karen

mohsin ho chara gar ho masiha ho kya ho tum

ham tum se apne dard ka kyun tazkira karen

kafi hai apne waste bas ik khuda ki zat

har dar pe ja ke kis liye ham iltija karen

buzdil ki tarah kis liye baithe hain ghat mein

himmat agar hai ap mein to samna karen

kya ek ham hi thahre mohabbat ke pasdar

kya ek ham hi sare jahan se wafa karen

sheron mein dhire dhire zarur aega nikhar

ustad shayaron ko ai tabish parha karen