اب تو وہ بھی مجھ کو تلقین شکیبائی کرے

اب تو وہ بھی مجھ کو تلقین شکیبائی کرے

کوئی کس سے شکوۂ آشوب تنہائی کرے

گفتگو سب سے بانداز پذیرائی کرے

اور سو سو طرح مجھ سے حیلہ آرائی کرے

کیا کرے وہ بھی کہ دستور زمانہ ہے یہی

بے رخی اپنوں سے غیروں سے شناسائی کرے

کیوں ہماری چارہ جوئی کے لئے آئے کوئی

کس کو فرصت ہے کہ تکلیف مسیحائی کرے

پھر اسی کوئے ملامت کی تمنا دل میں ہے

آئے اب کوئی ہماری ہمت افزائی کرے

کیا ملا فن کار کو سنگ ملامت کے سوا

کیوں لہو دل کا جلائے خامہ فرسائی کرے

ab to wo bhi mujh ko talqin-e-shakebai kare

koi kis se shikwa-e-ashob-e-tanhai kare

guftugu sab se bandaz pazirai kare

aur sau sau tarah mujh se hila arai kare

kya kare wo bhi ke dastur-e-zamana hai yahi

be rukhi apnon se ghairon se shanasai kare

kyun hamari chara joi ke liye ae koi

kis ko fursat hai ke taklif-e-masihai kare

phir isi ku-e-malamat ki tamanna dil mein hai

ae ab koi hamari himmat afzai kare

kya mila fan kar ko sang-e-malamat ke siwa

kyun lahu dil ka jalae khama farsai kare