نفس آرزو ہے شعلہ طراز

نفس آرزو ہے شعلہ طراز

سوز احساس تیری عمر دراز

خوش ہیں کھا کر فریب عشوۂ ناز

کس قدر سادہ دل ہیں اہل نیاز

بن گئی گردش جہاں کی حریف

حسن کی اک نگاہ فتنہ طراز

نام سنتے ہی آشیانے کا

لوٹ آئی ہے طاقت پرواز

خلش دل بڑھا گئی کچھ اور

آپ کی چشم التفات نواز

کہیں یہ ان کی رہگزر تو نہیں

جھک پڑی ہے غنیؔ جبین نیاز

ایک ہی ساز کے ہیں دو نغمے

میری خاموشی آپ کی آواز

nafas-e-arzu hai shola taraz

soz-e-ehsas teri umr-e-daraz

khush hain kha kar fareb-e-ishwa-e-naz

kis qadar sada dil hain ahl-e-niyaz

ban gai gardish jahan ki harif

husn ki ik nigah-e-fitna taraz

nam sunte hi ashiyane ka

laut ai hai taqat-e-parwaz

khalish-e-dil barha gai kuchh aur

ap ki chashm-e-iltifat nawaz

kahin ye un ki rahguzar to nahin

jhuk pari hai ghani jabin-e-niyaz

ek hi saz ke hain do naghme

meri khamoshi ap ki awaz