جینے کے ڈھب جب آئے تو مرنا پڑا مجھے

جینے کے ڈھب جب آئے تو مرنا پڑا مجھے

کس غم سے رم کیا کہ ٹھہرنا پڑا مجھے

میں اور اپنی جان کا دشمن نہیں نہیں

ایسی ہی وہ ادا تھی جو مرنا پڑا مجھے

کچھ خود مجھے ابھار گئی رفعت جمال

کچھ آپ پستیوں سے ابھرنا پڑا مجھے

حالانکہ اپنے آپ سے میں دور بھی نہ تھا

کتنے ہی راستوں سے گزرنا پڑا مجھے

غنچے کی طرح شب قفس رنگ و بو رہا

مانند گل سحر کو بکھرنا پڑا مجھے

اپنے ہی ہاتھوں آپ کو کھینچا صلیب پر

ماتم بھی اپنا آپ ہی کرنا پڑا مجھے

پھر کیا جو میں زمیں سے گیا تا بہ آسماں

آخر اسی زمیں پہ اترنا پڑا مجھے

کیا ڈھونڈتے ہو اب مرے لب پر شگفتگی

اک زخم تھا کہ خود جسے بھرنا پڑا مجھے

عرفیؔ سناؤ مژدہ مرے خیر خواہ کو

بگڑا زمانہ یہ کہ سدھرنا پڑا مجھے

jine ke dhab jab ae to marna para mujhe

kis gham se ram kiya ke thaharna para mujhe

main aur apni jan ka dushman nahin nahin

aisi hi wo ada thi jo marna para mujhe

kuchh khud mujhe ubhar gai rifat-e-jamal

kuchh ap pastiyon se ubharna para mujhe

halanke apne ap se main dur bhi na tha

kitne hi raston se guzarna para mujhe

ghunche ki tarah shab-e-qafas rang-o-bu raha

manind-e-gul sahar ko bikharna para mujhe

apne hi hathon ap ko khincha salib par

matam bhi apna ap hi karna para mujhe

phir kya jo main zamin se gaya ta ba asman

akhir isi zamin pe utarna para mujhe

kya dhundte ho ab mire lab par shaguftagi

ik zakhm tha ke khud jise bharna para mujhe

urfi sunao muzhda mire khair khwah ko

bigra zamana ye ke sudharna para mujhe