صبا سے آتی ہے کچھ بوئے آشنا مجھ کو

صبا سے آتی ہے کچھ بوئے آشنا مجھ کو

بلا رہا ہے مرے خوں کا ذائقہ مجھ کو

ہنوز صفحۂ ہستی پہ ہوں میں حرف غلط

کوئی ہنوز ہے لکھ لکھ کے کاٹتا مجھ کو

ہزار چہرہ طلسم گریز پا ہوں میں

اسیر کر نہ سکا کوئی آئنا مجھ کو

چلا ہی جاؤں میں پرچھائیوں کے دیس کو اور

پکارتا رہے کرنوں کا قافلہ مجھ کو

یہی ہیں رتجگے جب سے کھلیں مری آنکھیں

نہ تھا وہ خواب مرا اک عذاب تھا مجھ کو

چلا تھا میں تو سمندر کی تشنگی لے کر

ملا یہ کیسا سرابوں کا سلسلہ مجھ کو

یہ بات کس سے کہوں آہ اک گل خوبی

بڑے ہی پیار سے کانٹا چبھو گیا مجھ کو

saba se ati hai kuchh bu-e-ashna mujh ko

bala raha hai mire khun ka zaiqa mujh ko

hanoz safha-e-hasti pe hun main harf-e-ghalat

koi hanoz hai likh likh ke katta mujh ko

hazar chehra tilism-e-gurez pa hun main

asir kar na saka koi ana mujh ko

chala hi jaun main parchhaiyon ke des ko aur

pukarta rahe kirnon ka qafila mujh ko

yahi hain ratjage jab se khulen miri ankhen

na tha wo khwab mira ik azab tha mujh ko

chala tha main to samundar ki tishnagi le kar

mila ye kaisa sarabon ka silsila mujh ko

ye bat kis se kahun ah ik gul-e-khubi

bare hi pyar se kanta chubho gaya mujh ko