Arooz is now on the App Store, for iPhone and iPad. Download →

All poetry

سلسلے کے بعد کوئی سلسلہ روشن کریں

Zafar Gorakhpuri (1935–2017)

سلسلے کے بعد کوئی سلسلہ روشن کریں

اک دیا جب ساتھ چھوڑے دوسرا روشن کریں

اس طرح تو اور بھی کچھ بوجھ ہو جائے گی رات

کچھ کہیں کوئی چراغ واقعہ روشن کریں

جانے والے ساتھ اپنے لے گئے اپنے چراغ

آنے والے لوگ اپنا راستہ روشن کریں

جلتی بجھتی روشنی کا کھیل بچوں کو دکھائیں

شمع رکھیں ہاتھ میں گھر میں ہوا روشن کریں

آگہی دانش دعا جذبہ عقیدہ فلسفہ

اتنی قبریں ہائے کس کس پر دیا روشن کریں

شام یادوں سے معطر ہے منور ہے ظفرؔ

آج خوشبو کے وضو سے دست و پا روشن کریں