رہے نہ گھر کے ہوئے خوار یہ تو ہونا تھا

رہے نہ گھر کے ہوئے خوار یہ تو ہونا تھا

تری تلاش میں اے یار یہ تو ہونا تھا

قطار جلتے چراغوں کی بر سر دیوار

سیاہیاں پس دیوار یہ تو ہونا تھا

زمین بانٹنے والوں کے ہم مخالف تھے

ہمیں پہ آ گری تلوار یہ تو ہونا تھا

گزر کے اک رہ پر خار سے یہاں پہنچے

یہاں سے پھر رہ پر خار یہ تو ہونا تھا

افق سے پوچھ رہے ہیں کہاں گیا سورج

ہوئے تھے دیر سے بیدار یہ تو ہونا تھا

ہمیں نے اس کے لئے راستے بنائے تھے

کہ گھر تک آ گیا بازار یہ تو ہونا تھا

تعلقات کی تعمیر میں خلوص تھا کم

بلند تر ہوئی دیوار یہ تو ہونا تھا

rahe na ghar ke hue khwar ye to hona tha

tiri talash mein ai yar ye to hona tha

qatar jalte charaghon ki bar sar-e-diwar

siyahiyan pas-e-diwar ye to hona tha

zamin bantne walon ke ham mukhalif the

hamen pe a giri talwar ye to hona tha

guzar ke ik rah pur khar se yahan pahunche

yahan se phir rah pur khar ye to hona tha

ufuq se puchh rahe hain kahan gaya suraj

hue the der se bedar ye to hona tha

hamen ne us ke liye raste banae the

ke ghar tak a gaya bazar ye to hona tha

taalluqat ki taamir mein khulus tha kam

buland tar hui diwar ye to hona tha