یقین کو سینچنا ہے خوابوں کو پالنا ہے

یقین کو سینچنا ہے خوابوں کو پالنا ہے

بچا ہے تھوڑا سا جو اثاثہ سنبھالنا ہے

سوال یہ ہے چھڑا لیں مسئلوں سے دامن

کہ ان میں رہ کر ہی کوئی رستہ نکالنا ہے

جہان سوداگری میں دل کا وکیل بن کر

اس عہد کی منصفی کو حیرت میں ڈالنا ہے

جو مجھ میں بیٹھا اڑاتا رہتا ہے نیند میری

مجھے اب اس آدمی کو باہر نکالنا ہے

زمین زخموں پہ تیرے مرہم بھی ہم رکھیں گے

ابھی گڑی سوئیوں کو تن سے نکالنا ہے

کسی کو میدان میں اترنا ہے جیتنا ہے

کسی کو تا عمر صرف سکہ اچھالنا ہے

یہ ناؤ کاغذ کی جس نے ندی تو پار کر لی

کچھ اور سیکھے اب اس کو دریا میں ڈالنا ہے

yaqin ko sinchna hai khwabon ko palna hai

bacha hai thora sa jo asasa sambhalna hai

sawal ye hai chhura len masalon se daman

ke un mein rah kar hi koi rasta nikalna hai

jahan saudagri mein dil ka wakil ban kar

is ahd ki munsifi ko hairat mein dalna hai

jo mujh mein baitha urata rahta hai nind meri

mujhe ab us admi ko bahar nikalna hai

zamin zakhmon pe tere marham bhi ham rakhenge

abhi guri suiyon ko tan se nikalna hai

kisi ko maidan mein utarna hai jitna hai

kisi ko ta umr sirf sikka uchhalna hai

ye nao kaghaz ki jis ne naddi to par kar li

kuchh aur sikhe ab us ko dariya mein dalna hai