نہ بھول پائے تمہیں حادثہ ہی ایسا تھا

نہ بھول پائے تمہیں حادثہ ہی ایسا تھا

نہ بھر سکا کوئی اس کو خلا ہی ایسا تھا

وہ مجھ میں رہ کے مجھے کاٹتا رہا پل پل

زباں پہ آ نہ سکا ماجرا ہی ایسا تھا

نظر نہ آئی کہیں دور دور تک کوئی موج

میں غرق ہو گیا طوفاں اٹھا ہی ایسا تھا

نہ آیا لطف کسی اور غم کو جھیلنے میں

غم حیات ترا ذائقہ ہی ایسا تھا

کھلے تو لب مگر الفاظ دونوں سمت نہ تھے

مکالمہ نہ ہوا مرحلہ ہی ایسا تھا

اب اس کا رنج بھی کیا کیوں لہولہان ہیں پاؤں

چلے تھے جس پہ ظفرؔ راستہ ہی ایسا تھا

na bhul pae tumhen hadisa hi aisa tha

na bhar saka koi us ko khala hi aisa tha

wo mujh mein rah ke mujhe katta raha pal pal

zaban pe a na saka majra hi aisa tha

nazar na ai kahin dur dur tak koi mauj

main gharq ho gaya tufan utha hi aisa tha

na aya lutf kisi aur gham ko jhelne mein

gham-e-hayat tira zaiqa hi aisa tha

khule to lab magar alfaz donon samt na the

mukalama na hua marhala hi aisa tha

ab us ka ranj bhi kya kyun lahuluhan hain paon

chale the jis pe zafar rasta hi aisa tha