بیچ منجدھار دیا بڑھ کے سہارا کس نے

بیچ منجدھار دیا بڑھ کے سہارا کس نے

ہم تو تنہا تھے ہمیں پار اتارا کس نے

زندگی تجھ کو شب و روز کے دوزخ میں ترے

جس طرح ہم نے گزارا ہے گزارا کس نے

حال اب یہ کہ اندھیرا مرے خوں کا پیاسا

رکھ دیا ہے مری مٹھی میں ستارہ کس نے

سر بریدہ کوئی بچہ مرے اندر ہر روز

پوچھتا رہتا ہے مجھ سے مجھے مارا کس نے

پاؤں لگ جائیں تصور کو تو ہم چل نکلیں

ہم کو خوابوں کی گزر گہہ سے پکارا کس نے

عشق نقصان کا سودا تھا ظفرؔ میرے بعد

جانے برداشت کیا میرا خسارہ کس نے

bich manjdhar diya barh ke sahara kis ne

ham to tanha the hamen par utara kis ne

zindagi tujh ko shab-o-roz ke dozakh mein tire

jis tarah ham ne guzara hai guzara kis ne

hal ab ye ke andhera mire khun ka pyasa

rakh diya hai miri mutthi mein sitara kis ne

sar burida koi bachcha mire andar har roz

puchhta rahta hai mujh se mujhe mara kis ne

paon lag jaen tasawwur ko to ham chal niklen

ham ko khwabon ki guzar gah se pukara kis ne

ishq nuqsan ka sauda tha zafar mere baad

jane bardasht kiya mera khasara kis ne