کون یاد آیا یہ مہکاریں کہاں سے آ گئیں

کون یاد آیا یہ مہکاریں کہاں سے آ گئیں

دشت میں خوشبو کی بوچھاریں کہاں سے آ گئیں

کیسی شب ہے ایک اک کروٹ پہ کٹ جاتا ہے جسم

میرے بستر میں یہ تلواریں کہاں سے آ گئیں

خواب شاید پھر ہوا آنکھوں میں کوئی سنگسار

زیر مژگاں خون کی دھاریں کہاں سے آ گئیں

شاید اب تک مجھ میں کوئی گھونسلہ آباد ہے

گھر میں یہ چڑیوں کی چہکاریں کہاں سے آ گئیں

ساتھ ہے ملنا اگر چاہوں تو ملتا بھی نہیں

ایک گھر میں اتنی دیواریں کہاں سے آ گئیں

رکھ دیا کس نے مرے شانے پہ اپنا گرم ہاتھ

مجھ شکستہ پا میں رفتاریں کہاں سے آ گئیں

kaun yad aya ye mahkaren kahan se a gain

dasht mein khushbu ki bauchharen kahan se a gain

kaisi shab hai ek ik karwat pe kat jata hai jism

mere bistar mein ye talwaren kahan se a gain

khwab shayad phir hua ankhon mein koi sangsar

zer-e-mizhgan khun ki dharen kahan se a gain

shayad ab tak mujh mein koi ghonsla abad hai

ghar mein ye chiriyon ki chahkaren kahan se a gain

sath hai milna agar chahun to milta bhi nahin

ek ghar mein itni diwaren kahan se a gain

rakh diya kis ne mire shane pe apna garm hath

mujh shikasta pa mein raftaren kahan se a gain