ارادہ ہو اٹل تو معجزہ ایسا بھی ہوتا ہے

ارادہ ہو اٹل تو معجزہ ایسا بھی ہوتا ہے

دیے کو زندہ رکھتی ہے ہوا ایسا بھی ہوتا ہے

سنائی دے نہ خود اپنی صدا ایسا بھی ہوتا ہے

میاں تنہائی کا اک سانحہ ایسا بھی ہوتا ہے

چھڑے ہیں تار دل کے خانہ بربادی کے نغمے ہیں

ہمارے گھر میں صاحب رت جگا ایسا بھی ہوتا ہے

بہت حساس ہونے سے بھی شک کو راہ ملتی ہے

کہیں اچھا تو لگتا ہے برا ایسا بھی ہوتا ہے

کسی معصوم بچے کے تبسم میں اتر جاؤ

تو شاید یہ سمجھ پاؤ خدا ایسا بھی ہوتا ہے

زباں پر آ گئے چھالے مگر یہ تو کھلا ہم پر

بہت میٹھے پھلوں کا ذائقہ ایسا بھی ہوتا ہے

irada ho atal to mojiza aisa bhi hota hai

diye ko zinda rakhti hai hawa aisa bhi hota hai

sunai de na khud apni sada aisa bhi hota hai

miyan tanhai ka ik saneha aisa bhi hota hai

chhire hain tar dil ke khana barbadi ke naghme hain

hamare ghar mein sahab rut jaga aisa bhi hota hai

bahut hassas hone se bhi shak ko rah milti hai

kahin achchha to lagta hai bura aisa bhi hota hai

kisi maasum bachche ke tabassum mein utar jao

to shayad ye samajh pao khuda aisa bhi hota hai

zaban par a gae chhale magar ye to khula ham par

bahut mithe phalon ka zaiqa aisa bhi hota hai