تھی الگ راہ مگر ترک محبت نہیں کی

تھی الگ راہ مگر ترک محبت نہیں کی

اس نے بھی سوچا بہت ہم نے بھی عجلت نہیں کی

تو نے جو درد کی دولت ہمیں دی تھی اس میں

کچھ اضافہ ہی کیا ہم نے خیانت نہیں کی

زاویہ کیا ہے جو کرتا ہے تجھے سب سے الگ

کیوں ترے بعد کسی اور کی حسرت نہیں کی

آئے اور آ کے چلے بھی گئے کیا کیا موسم

تم نے دروازہ ہی وا کرنے کی ہمت نہیں کی

اپنے اطوار میں کتنا بڑا شاطر ہوگا

زندگی تجھ سے کبھی جس نے شکایت نہیں کی

ایک اک سانس کا اپنے سے لیا سخت حساب

ہم بھی کیا تھے کبھی خود سے بھی مروت نہیں کی

thi alag rah magar tark-e-mohabbat nahin ki

us ne bhi socha bahut ham ne bhi ujlat nahin ki

tu ne jo dard ki daulat hamen di thi is mein

kuchh izafa hi kiya ham ne khayanat nahin ki

zawiya kya hai jo karta hai tujhe sab se alag

kyun tire baad kisi aur ki hasrat nahin ki

ae aur a ke chale bhi gae kya kya mausam

tum ne darwaza hi wa karne ki himmat nahin ki

apne atwar mein kitna bara shatir hoga

zindagi tujh se kabhi jis ne shikayat nahin ki

ek ik sans ka apne se liya sakht hisab

ham bhi kya the kabhi khud se bhi murawwat nahin ki