دیکھیں قریب سے بھی تو اچھا دکھائی دے
Zafar Gorakhpuri (1935–2017)دیکھیں قریب سے بھی تو اچھا دکھائی دے
اک آدمی تو شہر میں ایسا دکھائی دے
اب بھیک مانگنے کے طریقے بدل گئے
لازم نہیں کہ ہاتھ میں کاسہ دکھائی دے
نیزے پہ رکھ کے اور مرا سر بلند کر
دنیا کو اک چراغ تو جلتا دکھائی دے
دل میں ترے خیال کی بنتی ہے اک دھنک
سورج سا آئنے سے گزرتا دکھائی دے
چل زندگی کی جوت جگائے عجب نہیں
لاشوں کے درمیاں کوئی رستہ دکھائی دے
کیا کم ہے کہ وجود کے سناٹے میں ظفرؔ
اک درد کی صدا ہے کہ زندہ دکھائی دے
dekhen qarib se bhi to achchha dikhai de
ik admi to shahr mein aisa dikhai de
ab bhik mangne ke tariqe badal gae
lazim nahin ke hath mein kasa dikhai de
neze pe rakh ke aur mira sar buland kar
duniya ko ik charagh to jalta dikhai de
dil mein tire khayal ki banti hai ik dhanak
suraj sa aine se guzarta dikhai de
chal zindagi ki jot jagae ajab nahin
lashon ke darmiyan koi rasta dikhai de
kya kam hai ke wajud ke sannate mein zafar
ik dard ki sada hai ke zinda dikhai de