لائی پھر اک لغزش مستانہ تیرے شہر میں

لائی پھر اک لغزش مستانہ تیرے شہر میں

پھر بنیں گی مسجدیں مے خانہ تیرے شہر میں

آج پھر ٹوٹیں گی تیرے گھر کی نازک کھڑکیاں

آج پھر دیکھا گیا دیوانہ تیرے شہر میں

جرم ہے تیری گلی سے سر جھکا کر لوٹنا

کفر ہے پتھراؤ سے گھبرانا تیرے شہر میں

شاہ نامے لکھے ہیں کھنڈرات کی ہر اینٹ پر

ہر جگہ ہے دفن اک افسانہ تیرے شہر میں

کچھ کنیزیں جو حریم ناز میں ہیں باریاب

مانگتی ہیں جان و دل نذرانہ تیرے شہر میں

ننگی سڑکوں پر بھٹک کر دیکھ جب مرتی ہے رات

رینگتا ہے ہر طرف ویرانہ تیرے شہر میں

lai phir ik laghzish-e-mastana tere shahr mein

phir banengi masjiden mai khana tere shahr mein

aj phir tutengi tere ghar ki nazuk khirkiyan

aj phir dekha gaya diwana tere shahr mein

jurm hai teri gali se sar jhuka kar lautna

kufr hai pathrao se ghabrana tere shahr mein

shah name likhe hain khandarat ki har int par

har jagah hai dafn ik afsana tere shahr mein

kuchh kanizen jo harim-e-naz mein hain baryab

mangti hain jan-o-dil nazrana tere shahr mein

nangi sarkon par bhatak kar dekh jab marti hai rat

rengta hai har taraf wirana tere shahr mein