شور یوں ہی نہ پرندوں نے مچایا ہوگا

شور یوں ہی نہ پرندوں نے مچایا ہوگا

کوئی جنگل کی طرف شہر سے آیا ہوگا

پیڑ کے کاٹنے والوں کو یہ معلوم تو تھا

جسم جل جائیں گے جب سر پہ نہ سایہ ہوگا

بانیٔ جشن بہاراں نے یہ سوچا بھی نہیں

کس نے کانٹوں کو لہو اپنا پلایا ہوگا

بجلی کے تار پہ بیٹھا ہوا ہنستا پنچھی

سوچتا ہے کہ وہ جنگل تو پرایا ہوگا

اپنے جنگل سے جو گھبرا کے اڑے تھے پیاسے

ہر سراب ان کو سمندر نظر آیا ہوگا

shor yun hi na parindon ne machaya hoga

koi jangal ki taraf shahr se aya hoga

per ke katne walon ko ye maalum to tha

jism jal jaenge jab sar pe na saya hoga

bani-e-jashn-e-baharan ne ye socha bhi nahin

kis ne kanton ko lahu apna pilaya hoga

bijli ke tar pe baitha hua hansta panchhi

sochta hai ke wo jangal to paraya hoga

apne jangal se jo ghabra ke ure the pyase

har sarab un ko samundar nazar aya hoga