کہتے ہیں ازل جس کو اس سے بھی کہیں پہلے

کہتے ہیں ازل جس کو اس سے بھی کہیں پہلے

ایمان محبت پر لائے تھے ہمیں پہلے

اسرار خود آگاہی دیوانے سمجھتے ہیں

تکمیل جنوں آخر معراج یقیں پہلے

چمکا دیا سجدوں نے نقش کف پا لیکن

روشن تو نہ تھی اتنی یہ میری جبیں پہلے

ہر بار یہ رہ رہ کر ہوتا ہے گماں مجھ کو

شاید ترے جلووں کو دیکھا تھا کہیں پہلے

یہ بات الگ ٹھہری اب ہم کو نہ پہچانیں

محفل میں مگر ان کی آئے تھے ہمیں پہلے

یہ راز محبت ہے سمجھے گا زمانہ کیا

تم حاصل دیں آخر غارت گر دیں پہلے

اس کار نمایاں کے شاہد ہیں چمن والے

گلشن میں بہاروں کو لائے تھے ہمیں پہلے

تقدیر کی مختاری عنوانؔ مسلم ہے

ہوتی ہے محبت بھی مجبور یہیں پہلے

kahte hain azal jis ko us se bhi kahin pahle

iman-e-mohabbat par lae the hamen pahle

asrar khud agahi diwane samajhte hain

takmil-e-junun akhir meraj-e-yaqin pahle

chamka diya sajdon ne naqsh-e-kaf pa lekin

raushan to na thi itni ye meri jabin pahle

har bar ye rah rah kar hota hai guman mujh ko

shayad tire jalwon ko dekha tha kahin pahle

ye bat alag thahri ab ham ko na pahchanen

mahfil mein magar un ki ae the hamen pahle

ye raz-e-mohabbat hai samjhega zamana kya

tum hasil den akhir gharat gar den pahle

is kar numayan ke shahid hain chaman wale

gulshan mein baharon ko lae the hamen pahle

taqdir ki mukhtari unwan-e-musallam hai

hoti hai mohabbat bhi majbur yahin pahle