کسی کے فیض قرب سے حیات اب سنور گئی

کسی کے فیض قرب سے حیات اب سنور گئی

نفس نفس مہک اٹھا نظر نظر نکھر گئی

نگاہ ناز جب اٹھی عجیب کام کر گئی

جو رنگ رخ اڑا دیا تو دل میں رنگ بھر گئی

مری سمجھ میں آ گیا ہر ایک راز زندگی

جو دل پہ چوٹ پڑ گئی تو دور تک نظر گئی

اب آس ٹوٹ کر مجھے سکوں نصیب ہو گیا

جو شام انتظار تھی وہ شام تو گزر گئی

کلی دل تباہ کی کھلی نہ چشتیٔؔ حزیں

خزاں بھی آ کے جا چکی بہار بھی گزر گئی

kisi ke faiz qurb se hayat ab sanwar gai

nafas nafas mahak utha nazar nazar nikhar gai

nigah-e-naz jab uthi ajib kam kar gai

jo rang-e-rukh ura diya to dil mein rang bhar gai

miri samajh mein a gaya har ek raz-e-zindagi

jo dil pe chot par gai to dur tak nazar gai

ab as tut kar mujhe sukun nasib ho gaya

jo sham-e-intizar thi wo sham to guzar gai

kali dil-e-tabah ki khuli na chashat hazin

khizan bhi a ke ja chuki bahar bhi guzar gai