رات کئی آوارہ سپنے آنکھوں میں لہرائے تھے

رات کئی آوارہ سپنے آنکھوں میں لہرائے تھے

شاید وہ خود بھیس بدل کر نیند چرانے آئے تھے

جیون کے وہ پیاسے لمحے برسوں میں راس آئے تھے

رات تری زلفوں کے بادل مستی میں لہرائے تھے

ہائے وہ مہکی مہکی راتیں ہائے وہ بہکے بہکے دن

جب وہ میرے مہماں بن کر میرے گھر میں آئے تھے

تم کو بھی آغاز محبت یاد تو ہوگا کم سے کم

پہلے پہل ملتے ہی نظریں ہم دونوں شرمائے تھے

ہائے وہ ربط و ضبط محبت ہائے یہ پاس شرط وفا

آج نہ ملنے پر بھی خوش ہیں کل مل کر پچھتائے تھے

rat kai awara sapne ankhon mein lahrae the

shayad wo khud bhes badal kar nind churane ae the

jiwan ke wo pyase lamhe barson mein ras ae the

rat tiri zulfon ke badal masti mein lahrae the

hae wo mahki mahki raten hae wo bahke bahke din

jab wo mere mehman ban kar mere ghar mein ae the

tum ko bhi aghaz-e-mohabbat yad to hoga kam se kam

pahle pahal milte hi nazren ham donon sharmae the

hae wo rabt-o-zabt-e-mohabbat hae ye pas shart-e-wafa

aj na milne par bhi khush hain kal mil kar pachhtae the