ایک اک لفظ میں ہے صندلیں جذبوں کا بہاؤ

ایک اک لفظ میں ہے صندلیں جذبوں کا بہاؤ

تیرے لہجے میں ہے کس جوئے رواں کا ٹھہراؤ

پھر ہوئی شام کرے دل کی تواضع کا خیال

کوئی بھولا ہوا منظر کوئی رستا ہوا گھاؤ

کوئی پتھر کسی کوچے میں نہ رہنے پائے

آج کرنا ہے کسی شیش محل پر پتھراؤ

میں پگھل جاؤں نہ سانسوں کی حرارت سے کہیں

پاس اتنے بھی نہ آؤ کہ اکیلے رہ جاؤ

چلچلاتی ہوئی یہ دھوپ یہ سنسان ڈگر

اب جو نکلے ہو سفر کو تو ذرا لطف اٹھاؤ

سونپ جائے نہ کہیں راکھ کا تحفہ یہ بھی

دل میں اب تک جو سلگتا ہے ترے غم کا الاؤ

گنگناؤ قمر اقبالؔ کی غزلیں لیکن

اک غزل اس کی اسے بھی تو کسی روز سناؤ

ek ik lafz mein hai sandalen jazbon ka bahao

tere lahje mein hai kis ju-e-rawan ka thahrao

phir hui sham kare dil ki tawazo ka khayal

koi bhula hua manzar koi rasta hua ghao

koi patthar kisi kuche mein na rahne pae

aj karna hai kisi shish mahal par pathrao

main pighal jaun na sanson ki hararat se kahin

pas itne bhi na ao ke akele rah jao

chilchilati hui ye dhup ye sunsan dagar

ab jo nikle ho safar ko to zara lutf uthao

saunp jae na kahin rakh ka tohfa ye bhi

dil mein ab tak jo sulagta hai tire gham ka alao

gungunao qamar iqbal ki ghazlen lekin

ik ghazal us ki use bhi to kisi roz sunao