تشنگی وہ تھی کہ جو روح تک آئی نہ گئی

تشنگی وہ تھی کہ جو روح تک آئی نہ گئی

جسم کی پیاس لبوں سے بھی بجھائی نہ گئی

میں نے ہر سمت ہی دیکھا ہے اسے جان بہار

گردش وقت کی تصویر گھمائی نہ گئی

ہائے وہ خون کے پیاسے ہیں انہیں کیا معلوم

لاش ماں باپ کی بچوں سے اٹھائی نہ گئی

ایک دن باغ طلسمات میں دیکھا میں نے

سبز پیڑوں کو کوئی بات سنائی نہ گئی

بارہا دیکھا ہے یک طرفہ تماشا میں نے

خاک اس دشت نوردی میں اڑائی نہ گئی

ہم نے کوشش تو بہت کی تھی مگر ہم سے اے دوست

اک تری یاد تھی جو ہم سے بھلائی نہ گئی

اس کی تمثیل گری دیکھ کے اندازہ ہوا

ہم سے کیوں خاک بسر زیست کمائی نہ گئی

ان کے قدموں کی میں آہٹ سے ہی پہچان گئی

در و دیوار کو آواز لگائی نہ گئی

سب نے اس ملک کو لوٹا ہے مہارت سے عمودؔ

حکمرانوں سے یہی بات چھپائی نہ گئی

tishnagi wo thi ke jo ruh tak ai na gai

jism ki pyas labon se bhi bujhai na gai

main ne har samt hi dekha hai use jan-e-bahar

gardish-e-waqt ki taswir ghumai na gai

hae wo khun ke pyase hain unhen kya maalum

lash man bap ki bachchon se uthai na gai

ek din bagh tilismat mein dekha main ne

sabz peron ko koi bat sunai na gai

barha dekha hai yak turfa tamasha main ne

khak is dasht nawardi mein urai na gai

ham ne koshish to bahut ki thi magar ham se ai dost

ik tiri yad thi jo ham se bhalai na gai

us ki tamsil giri dekh ke andaza hua

ham se kyun khak basar zist kamai na gai

un ke qadmon ki main ahat se hi pahchan gai

dar-o-diwar ko awaz lagai na gai

sab ne is mulk ko lauta hai maharat se umud

hukmranon se yahi bat chhupai na gai