ہنستی ہوئی تنہا وہ دریچے میں کھڑی ہے

ہنستی ہوئی تنہا وہ دریچے میں کھڑی ہے

لڑکی ہے کہ ترشے ہوئے ہیروں کی لڑی ہے

سونے کا یہ انداز ہے خفگی کی علامت

چہرہ کئے دیوار کی جانب وہ پڑی ہے

کہرے میں گھری شام کی ڈولی سے اتر کر

تنہائی کی چوکھٹ پہ تری یار کھڑی ہے

دل عمر کے قانون کا قائل نہیں ورنہ

احساس اسے بھی ہے کہ وہ مجھ سے بڑی ہے

آنکھوں میں ترے غم کا ہے ہنستا ہوا موسم

دل میں تری یادوں کی ہری فصل کھڑی ہے

پابندئ اوقات ہوئی اس سے نہ ہوگی

ہر چند کہ نازک سے کلائی میں گھڑی ہے

مقتول کو کر آئے جہاں دفن قمرؔ لوگ

تلوار بھی قاتل کی وہیں پر تو گڑی ہے

hansti hui tanha wo dariche mein khari hai

larki hai ke tarshe hue hiron ki lari hai

sone ka ye andaz hai khafagi ki alamat

chehra kiye diwar ki janib wo pari hai

kohre mein ghiri sham ki doli se utar kar

tanhai ki chaukhat pe tiri yar khari hai

dil umr ke qanun ka qail nahin warna

ehsas use bhi hai ke wo mujh se bari hai

ankhon mein tire gham ka hai hansta hua mausam

dil mein tiri yadon ki hari fasl khari hai

pabandi-e-auqat hui us se na hogi

har chand ke nazuk se kalai mein ghari hai

maqtul ko kar ae jahan dafn qamar log

talwar bhi qatil ki wahin par to guri hai