سب پگھل جائے تماشہ وہ ادھر کب ہوگا

سب پگھل جائے تماشہ وہ ادھر کب ہوگا

موم کے شہر سے سورج کا گزر کب ہوگا

خواب کاغذ کے سفینے ہیں بچائیں کیسے

ختم اس آگ کے دریا کا سفر کب ہوگا

جس کا نقشہ ہے مرے ذہن میں اک مدت سے

گھر وہ تعمیر سے پہلے ہی کھنڈر کب ہوگا

میرے کھوئے ہوئے محور پہ جو پہنچائے مجھے

اب لہو میں مرے پیدا وہ بھنور کب ہوگا

سبز رکھا ہے جسے میں نے لہو دے کے قمرؔ

مہرباں دھوپ میں آخر وہ شجر کب ہوگا

sab pighal jae tamasha wo idhar kab hoga

mom ke shahr se suraj ka guzar kab hoga

khwab kaghaz ke safine hain bachaen kaise

khatm is ag ke dariya ka safar kab hoga

jis ka naqsha hai mire zehn mein ik muddat se

ghar wo taamir se pahle hi khandar kab hoga

mere khoe hue mehwar pe jo pahunchae mujhe

ab lahu mein mire paida wo bhanwar kab hoga

sabz rakha hai jise main ne lahu de ke qamar

mehrban dhup mein akhir wo shajar kab hoga