بچھڑ گیا ہے کہاں کون کچھ پتہ ہی نہیں

بچھڑ گیا ہے کہاں کون کچھ پتہ ہی نہیں

سفر میں جیسے کوئی اپنے ساتھ تھا ہی نہیں

کسی سے ربط بڑھائیں تو مت خفا ہونا

کہ دل میں اب تری یادوں کا سلسلہ ہی نہیں

سب اپنے اپنے مسیحا کے انتظار میں ہیں

کسی کا جیسے زمانے میں اب خدا ہی نہیں

اک عمر کٹ گئی کاغذ سیاہ کرتے ہوئے

قلم کو اپنے جو لکھنا تھا وہ لکھا ہی نہیں

قمرؔ وہ شخص ہمارے نگر میں کیا آیا

بتوں کو بھی ہے گلہ کوئی پوجتا ہی نہیں

bichhar gaya hai kahan kaun kuchh pata hi nahin

safar mein jaise koi apne sath tha hi nahin

kisi se rabt barhaen to mat khafa hona

ke dil mein ab tiri yadon ka silsila hi nahin

sab apne apne masiha ke intizar mein hain

kisi ka jaise zamane mein ab khuda hi nahin

ik umr kat gai kaghaz siyah karte hue

qalam ko apne jo likhna tha wo likha hi nahin

qamar wo shakhs hamare nagar mein kya aya

buton ko bhi hai gila koi pujta hi nahin