سانحہ قسمتوں کے دریچوں میں لپکے گا چھپ جائے گا بات ٹل جائے گی

سانحہ قسمتوں کے دریچوں میں لپکے گا چھپ جائے گا بات ٹل جائے گی

سب مسافر گھروں کو پلٹ جائیں گے غم کی وحشت خوشی میں بدل جائے گی

ہم ستاروں کی مانند ٹوٹیں گے اور آسماں پر لکیریں بنا جائیں گے

موت کا رقص کرتی ہوئی ایک ساعت رکے گی کہیں پھر سنبھل جائے گی

سارے بکھرے ہوئے لفظ کوئی اٹھا لائے گا آن کی آن میں اور پھر

الجھی الجھی زباں اپنی ترتیب بدلے گی اور اک کہانی میں ڈھل جائے گی

ایک دن ہم ارادہ کریں گے کہ اب اپنے خوابوں کی قیمت نہیں لیں گے ہم

ایک دن ہم بدل جائیں گے اور پھر خود بخود ساری دنیا بدل جائے گی

جب ستارے بجھیں گے تو شب کے سمندر میں لہروں کا رخ دیکھنے کے لیے

صبح کاذب کی آنکھیں اچانک کھلیں گی بشارت کی قندیل جل جائے گی

درد کی لو کی مدھم حرارت کے پہلو میں پتھر کا دل بھی تڑخ جائے گا

یہ جو لوہے کی دیوار اطراف جاں کھینچ رکھی ہے یہ بھی پگھل جائے گی

اتنا خالی یہ ہو جائے گا خالی ہونے کی دل سے خلش بھی نکل جائے گی

saneha qismaton ke darichon mein lapkega chhup jaega bat tal jaegi

sab musafir gharon ko palat jaenge gham ki wahshat khushi mein badal jaegi

ham sitaron ki manind tutenge aur asman par lakiren bana jaenge

maut ka raqs karti hui ek saat rukegi kahin phir sambhal jaegi

sare bikhre hue lafz koi utha laega an ki an mein aur phir

uljhi uljhi zaban apni tartib badlegi aur ik kahani mein dhal jaegi

ek din ham irada karenge ke ab apne khwabon ki qimat nahin lenge ham

ek din ham badal jaenge aur phir khud bakhud sari duniya badal jaegi

jab sitare bujhenge to shab ke samundar mein lahron ka rukh dekhne ke liye

subh-e-kazib ki ankhen achanak khulengi basharat ki qindil jal jaegi

dard ki lau ki maddham hararat ke pahlu mein patthar ka dil bhi tarakh jaega

ye jo lohe ki diwar atraf jan khinch rakhi hai ye bhi pighal jaegi

itna khali ye ho jaega khali hone ki dil se khalish bhi nikal jaegi