کوئی سایہ سا لپٹ جاتا ہے دل سے آ کر

کوئی سایہ سا لپٹ جاتا ہے دل سے آ کر

کھڑکیاں کھولنی پڑتی ہیں مجھے گھبرا کر

بے ثمر پیڑوں کی خواہش بھی عجب خواہش ہے

بیج بوتی ہوں کہیں اور سے مٹی لا کر

خاک پر پھول جو کھلتا ہے تو میں سوچتی ہوں

کوئی خوش ہوتا تھا اک رنگ مجھے پہنا کر

اپنے گہنوں میں کسی اور کا چہرہ دیکھا

زندگی مجھ پہ ہنسی میرے ہی گھر میں آ کر

جیسے دنیا سے بہت دور چلی آئی ہوں

مطمئن رہتی ہوں اک جھوٹ سے جی بہلا کر

koi saya sa lipat jata hai dil se a kar

khirkiyan kholni parti hain mujhe ghabra kar

be samar peron ki khwahish bhi ajab khwahish hai

bij boti hun kahin aur se mitti la kar

khak par phul jo khulta hai to main sochti hun

koi khush hota tha ik rang mujhe pahna kar

apne gahnon mein kisi aur ka chehra dekha

zindagi mujh pe hansi mere hi ghar mein a kar

jaise duniya se bahut dur chali ai hun

mutmain rahti hun ik jhut se ji bahla kar