دولت درد سمیٹو کہ بکھرنے کو ہے

دولت درد سمیٹو کہ بکھرنے کو ہے

رات کا آخری لمحہ بھی گزرنے کو ہے

خشت در خشت عقیدت نے بنایا جس کو

ابر آزار اسی گھر پہ ٹھہرنے کو ہے

کشت برباد سے تجدید وفا کر دیکھو

اب تو دریاؤں کا پانی بھی اترنے کو ہے

اپنی آنکھوں میں وہی عکس لیے پھرتے ہیں

جیسے آئینۂ مقسوم سنورنے کو ہے

جو ڈبوئے گی نہ پہنچائے گی ساحل پہ ہمیں

اب وہی موج سمندر سے ابھرنے کو ہے

کنج تنہائی میں کھلتا ہے تخیل میرا

اور میں خوش ہوں کہ یہ گل پھر سے نکھرنے کو ہے

daulat-e-dard sameto ke bikharne ko hai

rat ka akhiri lamha bhi guzarne ko hai

khisht-e-dar khisht aqidat ne banaya jis ko

abr azar isi ghar pe thaharne ko hai

kisht-e-barbad se tajdid-e-wafa kar dekho

ab to dariyaon ka pani bhi utarne ko hai

apni ankhon mein wahi aks liye phirte hain

jaise aina-e-maqsum sanwarne ko hai

jo duboegi na pahunchaegi sahil pe hamen

ab wahi mauj samundar se ubharne ko hai

kunj-e-tanhai mein khulta hai takhayyul mera

aur main khush hun ke ye gul phir se nikharne ko hai