مجھے آگہی کا نشاں سمجھ کے مٹاؤ مت

مجھے آگہی کا نشاں سمجھ کے مٹاؤ مت

یہ چراغ جلنے لگا ہے اس کو بجھاؤ مت

مجھے جاگنا ہے تمام عمر اسی طرح

مجھے صبح و شام کے سلسلے میں ملاؤ مت

مجھے علم ہے مرے خال و خد میں کمی ہے کیا

مجھے آئنے کا طلسم کوئی دکھاؤ مت

میں خلوص دل کی بلندیوں کے سفر پہ ہوں

مجھے داستان فریب کوئی سناؤ مت

مجھے دیکھ لینے دو صبح فردا کی روشنی

مری آنکھ سے ابھی ہاتھ اپنا ہٹاؤ مت

وہی پیڑ ہے وہی شاخ ہے وہی نام ہے

جو گرا ہے پھول یہاں سے اس کو اٹھاؤ مت

مجھے تہہ میں جا کے اچھالنے ہیں گہر کئی

میں ہوں مطمئن مجھے ڈوبنے سے بچاؤ مت

تمہیں بے مقام رفاقتوں کی تلاش ہے

مرا شہر شہر ثبات ہے یہاں آؤ مت

mujhe agahi ka nishan samajh ke mitao mat

ye charagh jalne laga hai us ko bujhao mat

mujhe jagna hai tamam umr isi tarah

mujhe subh-o-sham ke silsile mein milao mat

mujhe ilm hai mire khal-o-khad mein kami hai kya

mujhe aine ka tilism koi dikhao mat

main khulus-e-dil ki bulandiyon ke safar pe hun

mujhe dastan-e-fareb koi sunao mat

mujhe dekh lene do subh-e-farda ki raushni

miri ankh se abhi hath apna hatao mat

wahi per hai wahi shakh hai wahi nam hai

jo gira hai phul yahan se us ko uthao mat

mujhe tah mein ja ke uchhalne hain guhar kai

main hun mutmain mujhe dubne se bachao mat

tumhen be maqam rifaqaton ki talash hai

mira shahr shahr sabat hai yahan ao mat