عطائے ابر سے انکار کرنا چاہیئے تھا

عطائے ابر سے انکار کرنا چاہیئے تھا

میں صحرا تھی مجھے اقرار کرنا چاہیئے تھا

لہو کی آنچ دینی چاہیئے تھی فیصلے کو

اسے پھر نقش بر دیوار کرنا چاہیئے تھا

اگر لفظ و بیاں ساکت کھڑے تھے دوسری سمت

ہمیں کو رنج کا اظہار کرنا چاہیئے تھا

اگر اتنی مقدم تھی ضرورت روشنی کی

تو پھر سائے سے اپنے پیار کرنا چاہیئے تھا

سمندر ہو تو اس میں ڈوب جانا بھی روا ہے

مگر دریاؤں کو تو پار کرنا چاہیئے تھا

دل خوش فہم کو صبح سفر کی روشنی میں

شب غم کے لیے تیار کرنا چاہیئے تھا

شکست زندگی کا عکس بن کر رہ گیا ہے

وہی لمحہ جسے شہکار کرنا چاہیئے تھا

ata-e-abr se inkar karna chahiye tha

main sahra thi mujhe iqrar karna chahiye tha

lahu ki anch deni chahiye thi faisle ko

use phir naqsh-e-bar diwar karna chahiye tha

agar lafz-o-bayan sakit khare the dusri samt

hamen ko ranj ka izhar karna chahiye tha

agar itni muqaddim thi zarurat raushni ki

to phir sae se apne pyar karna chahiye tha

samundar ho to is mein dub jana bhi rawa hai

magar dariyaon ko to par karna chahiye tha

dil-e-khush fahm ko subh-e-safar ki raushni mein

shab-e-gham ke liye tayyar karna chahiye tha

shikast-e-zindagi ka aks ban kar rah gaya hai

wahi lamha jise shahkar karna chahiye tha