ایک اک حرف سمیٹو مجھے تحریر کرو

ایک اک حرف سمیٹو مجھے تحریر کرو

میری یکسوئی کو آمدۂ زنجیر کرو

سب خد و خال مرے دھند ہوئے جاتے ہیں

صبح کے رنگ سے آؤ مجھے تصویر کرو

جیتنا میرے لیے کرب ہوا جاتا ہے

میرے پندار کو توڑو مجھے تسخیر کرو

اس عمارت کو گرا دو جو نظر آتی ہے

مرے اندر جو کھنڈر ہے اسے تعمیر کرو

اب میری آنکھ سے لے لو خلش بینائی

یا مرے خواب کو شرمندۂ تعبیر کرو

ek ik harf sameto mujhe tahrir karo

meri yaksoi ko amada-e-zanjir karo

sab khad-o-khal mire dhund hue jate hain

subh ke rang se ao mujhe taswir karo

jitna mere liye karb hua jata hai

mere pindar ko toro mujhe taskhir karo

is imarat ko gira do jo nazar ati hai

mire andar jo khandar hai use taamir karo

ab meri ankh se le lo khalish binai

ya mire khwab ko sharminda-e-taabir karo