کیا ہوا کوئی سوچتا بھی نہیں

کیا ہوا کوئی سوچتا بھی نہیں

اور کہنے کو کچھ ہوا بھی نہیں

جیسے گم ہو گئی شناخت مری

اب کوئی مجھ کو ڈھونڈھتا بھی نہیں

جس سے رہنے لگے گلے مجھ کو

وہ ابھی مجھ کو جانتا بھی نہیں

ایسا خاموش بھی نہیں لگتا

اور کچھ منہ سے بولتا بھی نہیں

چاہتا ہے جواب بھی سارے

اور کچھ مجھ سے پوچھتا بھی نہیں

مسترد بھی کبھی نہیں کرتا

وہ مری بات مانتا بھی نہیں

داد دیتا ہے جیتنے پہ مجھے

اور کبھی مجھ سے ہارتا بھی نہیں

خواب تک میرے چھین لیتا ہے

اور کچھ مجھ سے مانگتا بھی نہیں

اس طرف سب چراغ جلتے ہیں

جس طرف کوئی راستہ بھی نہیں

رات دن پر محیط ہے تو رہے

روشنی کوئی چاہتا بھی نہیں

ڈوبتے آفتاب کی جانب

دیر تک کوئی دیکھتا بھی نہیں

kya hua koi sochta bhi nahin

aur kahne ko kuchh hua bhi nahin

jaise gum ho gai shanakht miri

ab koi mujh ko dhundhta bhi nahin

jis se rahne lage gale mujh ko

wo abhi mujh ko janta bhi nahin

aisa khamosh bhi nahin lagta

aur kuchh munh se bolta bhi nahin

chahta hai jawab bhi sare

aur kuchh mujh se puchhta bhi nahin

mustarad bhi kabhi nahin karta

wo miri bat manta bhi nahin

dad deta hai jitne pe mujhe

aur kabhi mujh se harta bhi nahin

khwab tak mere chhin leta hai

aur kuchh mujh se mangta bhi nahin

is taraf sab charagh jalte hain

jis taraf koi rasta bhi nahin

rat din par muhit hai to rahe

raushni koi chahta bhi nahin

dubte aftab ki janib

der tak koi dekhta bhi nahin