یقین جاتا رہا اعتبار ختم ہوا

یقین جاتا رہا اعتبار ختم ہوا

تمہارے عشق کا سارا خمار ختم ہوا

کہاں سے لاؤں وہ ہنگامہ ہائے عشق و جنوں

وہ شعلہ آسا دل بے قرار ختم ہوا

نکل رہا ہوں ترے حلقۂ محبت سے

کہ گرد بیٹھ چکی اور غبار ختم ہوا

جہاں بہاریں تھیں اپنوں کی چہچہاہٹ تھی

وہ بے چراغ پڑا سبزہ زار ختم ہوا

لگا کے آگ کئی مہربان چلتے بنے

ہمارے شہر کا سب کاروبار ختم ہوا

خزاں کا دور ہے شاخوں پہ برگ و بار نہیں

تمہارے جاتے ہی عہد بہار ختم ہوا

yaqin jata raha etibar khatm hua

tumhare ishq ka sara khumar khatm hua

kahan se laun wo hangama ha-e-ishq-o-junun

wo shola asa dil be qarar khatm hua

nikal raha hun tire halqa-e-mohabbat se

ke gard baith chuki aur ghubar khatm hua

jahan baharen thin apnon ki chahchahahat thi

wo be charagh para sabza zar khatm hua

laga ke ag kai mehrban chalte bane

hamare shahr ka sab karobar-e-khatm hua

khizan ka daur hai shakhon pe barg-o-bar nahin

tumhare jate hi ahd-e-bahar khatm hua