تیرے حسین جسم کی پھولوں میں باس ہے

تیرے حسین جسم کی پھولوں میں باس ہے

گو وہم ہے یہ وہم قرین قیاس ہے

وہ اشک جس پہ چاندنی‌ شب کا لباس ہے

شاید کتاب غم کا کوئی اقتباس ہے

میری طرح ہر اک کو ہے چاہت اسی کی پھر

گزرے دنوں کے زہر میں کتنی مٹھاس ہے

برسوں گزر گئے مگر اب تک نہیں بجھی

کتنی عجیب ریت کے ساحل کی پیاس ہے

میری صدا کھچ اس طرح آئی ہے لوٹ کر

محسوس ہو رہا ہے کوئی آس پاس ہے

بوندیں پڑیں تو اور زیادہ ہوئی تپش

شاید اسی کا نام زمیں کی بھڑاس ہے

اپنے گھروں میں خوش ہیں چراغوں کو لے کے لوگ

کس کو خبر کہ رات کا چہرہ اداس ہے

دھندلا سا زرد ماضی کا ہو جس طرح ورق

کتنا حسین آپ کا رنگ لباس ہے

کس وقت کیفؔ ٹوٹ کے گر جائے کیا خبر

پلکوں پہ ایک حلقۂ زنجیر یاس ہے

tere hasin jism ki phulon mein bas hai

go wahm hai ye wahm qarin-e-qayas hai

wo ashk jis pe chandni shab ka libas hai

shayad kitab-e-gham ka koi iqtibas hai

meri tarah har ik ko hai chahat usi ki phir

guzre dinon ke zahr mein kitni mithas hai

barson guzar gae magar ab tak nahin bujhi

kitni ajib ret ke sahil ki pyas hai

meri sada khich is tarah ai hai laut kar

mahsus ho raha hai koi as pas hai

bunden paren to aur ziyada hui tapish

shayad usi ka nam zamin ki bhirus hai

apne gharon mein khush hain charaghon ko le ke log

kis ko khabar ke rat ka chehra udas hai

dhundla sa zard mazi ka ho jis tarah waraq

kitna hasin ap ka rang-e-libas hai

kis waqt kaif tut ke gir jae kya khabar

palkon pe ek halqa-e-zanjir yas hai