اگرچہ حادثے گزرے ہیں پانیوں کی طرح

اگرچہ حادثے گزرے ہیں پانیوں کی طرح

خموش رہ گئے ہم لوگ ساحلوں کی طرح

کسی کے سامنے میں کس لیے زباں کھولوں

ملی ہے اپنی انا مجھ کو دشمنوں کی طرح

ترے بغیر نظر آئے ہیں مجھے اکثر

مکان کے در و دیوار قاتلوں کی طرح

نہ جانے کون سی منزل کو چل دیے پتے

بھٹک رہی ہیں ہوائیں مسافروں کی طرح

ہمیں نے کھول کے لب روح پھونک دی ورنہ

تمام حرف تھے بے جان پتھروں کی طرح

میں رو رہا تھا شب غم کی ظلمتوں سے بہت

خدا کا شکر جلے زخم مشعلوں کی طرح

یہی تو کیفؔ حسد ہے کہ دل بھی یاروں کے

سیاہ ہو گئے لکھے ہوئے خطوں کی طرح

agarche hadse guzre hain paniyon ki tarah

khamosh rah gae ham log sahilon ki tarah

kisi ke samne mein kis liye zaban kholun

mili hai apni ana mujh ko dushmanon ki tarah

tire baghair nazar ae hain mujhe aksar

makan ke dar-o-diwar qatilon ki tarah

na jane kaun si manzil ko chal diye patte

bhatak rahi hain hawaen musafiron ki tarah

hamen ne khol ke lab ruh phunk di warna

tamam harf the be jan pattharon ki tarah

main ro raha tha shab-e-gham ki zulmaton se bahut

khuda ka shukr jale zakhm mashlon ki tarah

yahi to kaif-e-hasad hai ke dil bhi yaron ke

siyah ho gae likhe hue khaton ki tarah