چاند ابھرا نہ مرے جسم سے سایا نکلا

چاند ابھرا نہ مرے جسم سے سایا نکلا

شام غم آئی تو میں گھر سے اکیلا نکلا

آج آیا ہے دریچے پہ ہوا کا جھونکا

آج کوئی تو مجھے دیکھنے والا نکلا

یہ الگ بات کہ کھلنے لگے پلکوں کے ورق

نوک لب سے نہ کبھی حرف تمنا نکلا

ہو گئے اور در و بام نظر سے اوجھل

در حقیقت یہ اجالا بھی اندھیرا نکلا

کوئی آواز تو آ جاتی کہیں سے واپس

یہ کنواں گھر کا تو اتنا بھی نہ گہرا نکلا

لوٹ جا اب مری آنکھوں میں نہیں ہیں آنسو

تو سمندر جسے سمجھا تھا وہ صحرا نکلا

chand ubhra na mire jism se saya nikla

sham-e-gham ai to main ghar se akela nikla

aj aya hai dariche pe hawa ka jhonka

aj koi to mujhe dekhne wala nikla

ye alag bat ke khulne lage palkon ke waraq

nok lab se na kabhi harf-e-tamanna nikla

ho gae aur dar-o-bam-e-nazar se ojhal

dar haqiqat ye ujala bhi andhera nikla

koi awaz to a jati kahin se wapas

ye kuan ghar ka to itna bhi na gahra nikla

laut ja ab miri ankhon mein nahin hain ansu

tu samundar jise samjha tha wo sahra nikla