ان جھلملاتے چاند ستاروں کی چھاؤں میں

ان جھلملاتے چاند ستاروں کی چھاؤں میں

دھیمے سروں میں گائے جو بابل تو ہم سنیں

آنگن میں تیرے پھول رہی ہوگی کامنی!

جی چاہتا ہے آج بسیرا وہیں کریں

یہ چاند آج اگا ہے بڑی آرزو کے بعد

آؤ مئے نشاط پئیں غم غلط کریں

اپنی سہاگ رات کبھی بھولتیں نہیں

میرے حسیں دیار کی شرمیلی عورتیں

رنگ حنا سے سرخ رہیں ان کی انگلیاں

اے کاش ساری عمر وہ دولہن بنی رہیں

پیارے ہیں آج ہم بھی بہت دیر سے نڈھال

تم بھی تھکے ہوئے ہو چلو آؤ سو رہیں

جانے ہے کون محو سفر آدھی رات کو

جانے یہ کس کی دور سے آتی ہیں آہٹیں

ہم کو بلا لیا کرو باتیں کیا کرو

دل میں تمہارے درد کے طوفان جب اٹھیں

افتادگان راہ کے دل پر لگے گی چوٹ

منزل پہ جا کے قافلے آواز یوں نہ دیں

تم نے تمام باغ کو ویران کر دیا

ایندھن کے تاجرو یہ پپیہے کہاں رہیں

ہر مرحلہ پہ دوراںؔ ہمیں ان کی ہو تلاش

ہر منزل حیات پہ ان کا ہی نام لیں

un jhilmilate chand sitaron ki chhaon mein

dhime saron mein gae jo babil to ham sunen

angan mein tere phul rahi hogi kamni!

ji chahta hai aj basera wahin karen

ye chand aj uga hai bari arzu ke baad

ao mai-e-nishat piyen gham ghalat karen

apni suhag rat kabhi bhultin nahin

mere hasin dayar ki sharmili auraten

rang-e-hina se surkh rahen un ki ungliyan

ai kash sari umr wo dolhan bani rahen

pyare hain aj ham bhi bahut der se nidhal

tum bhi thake hue ho chalo ao so rahen

jane hai kaun mahw-e-safar adhi rat ko

jane ye kis ki dur se ati hain ahaten

ham ko bala liya karo baten kiya karo

dil mein tumhare dard ke tufan jab uthen

uftadagan rah ke dil par lagegi chot

manzil pe ja ke qafile awaz yun na den

tum ne tamam bagh ko wiran kar diya

indhan ke tajiro ye papihe kahan rahen

har marhala pe dauran hamen un ki ho talash

har manzil-e-hayat pe un ka hi nam len